Ipinaskil ni: diwa81 | Disyembre 18, 2009

Congress Joint Session


Senate: Martial law illegal.
Malacañang: Mahuli may tae sa pwet!

Sabi ko na nga ba, sa bagal kumilos ng Kongreso kaugnay ng Martial Law, inalis na ito ni Gloria bago pa man sila nakapagbotohan pabor o kontra sa PP 1959. Noong una pa man, nagdududa na ang marami na baka maging moot and academic na ang desisyon ng Kongreso dahil lampas na sa 48 oras na palugit. Ngayon talagang moot and academic na nga, dahil lampas na … nakalampas na ang Martial Law mismo!
Ano nga kaya ang nangyari, bakit tinanggal na ang Martial Law bago pa makapagbotohan ang Kongreso? Sa tingin ko, nahirapan ang mga Kongresista na bumoto pabor dito. Totoo na malakas ang impluwensya ng Malacañang sa karamihan ng Kongresista, pero malapit na ang eleksyon. Sino ba naman ang gustong gumawa ng desisyon na tiyak na ikakagalit ng mga botante nila at siguradong maaalala pa hanggang sa araw ng eleksyon na ilang buwan na lang ang hinihintay? Malakas man ang impluwensya noon, may sariling karerang pinoproblema ang bawat isa sa maraming kongresista ngayon.
Kung hindi boboto nang pabor ang Kongreso, lalo namang hindi mapapayagan ng Malacañang na supalpalin ito ng lehislatura. Kaya ang solusyon, bawiin na ang deklarasyon bago pa lumabas ang boto.
Pero sa pagbawi, buo pa rin ang loob ni Gloria na pangatwiranan ang ginawa niyang paglalaro ng kapangyarihan. Umaksyon umano siya noong panahon na puro salita lang ang ginawa ng iba. Ang problema, ibang aksyon naman ang ginawa, habang napakasimple lang naman ng kailangang gawin: hulihin ang mga salarin. Tinahak niya umano ang landas na kinatatakutan ng ibang tahakin. Ang totoo, marami ring may gusto na gawin ang ginawa niya. Iyong mga naunang presidente sa kanya, matagal na balak din nila iyon. Maliban lamang kay Cory, na ilang ulit na hinimok na magpataw ng Martial Law bilang tugon sa ilang ulit na kudeta laban sa rehimen niya, pero hindi niya sinunod. Hindi sa takot ang mga nauna, kundi si Gloria lang ang nagkaroon ng ganoon kakapal na mukha para magawa iyon sa kabila ng labis na pagkamuhi ng sambayanan sa kanya.
Hindi masisisi ang ilan na pumabor sa deklarasyon. Marami daw sa mga taga-Maguindanao ang pabor. Pero ayon lang ito kay Vice Mayor Esmael Mangudadatu, at taliwas sa mga naunang ulat na marami ang lumikas para makaiwas sa gulo. Maiintindihan pa si Mangudadatu kung bakit pabor siya. Natural naman, siya ang pangunahing kalaban ng mga Ampatuan na napakalaki ng private army. Kapag nabuwag iyon, at nakontrol ang mga Ampatuan, siya ang kagyat na makikinabang. Pero ang punto dito, hindi naman kailangan ng Martial Law para mabuwag ang hukbo ni Ampatuan. At lalong hindi kailangan ng Martial Law para makamit ang hustisya sa pagkamatay ng 57 katao. Sa kabaliktaran, nakasama pa nga ang deklarasyon sa kasong isinusulong laban sa mga Ampatuan.


Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Palitan )

Twitter picture

You are commenting using your Twitter account. Log Out / Palitan )

Facebook photo

You are commenting using your Facebook account. Log Out / Palitan )

Google+ photo

You are commenting using your Google+ account. Log Out / Palitan )

Connecting to %s

Mga Kategoriya

%d bloggers like this: